KAMUS BASAJAN ENTRI A & B

KAMUS BASAJAN
Ku: Ani Herliani SAPAMAS:

Kecap anu tos langki dianggo.

1. ADUAN: jalmi tukang ngawartoskeun kaawonan anu sanés ka guru atanapi ka dunungan.

Conto:

Kadé ulah sagawayah ngomong hareupeun Si Éta, aduan manéhna mah.

2. ADU TAWAR: nawis pangaos atanapi naon waé.

Conto:

Sanggeus adu tawar mah sok manéhna mikeun duit, atuh balikna téh nungtun domba.

3. ADU RÉNYOM: paseueur-seueur cariosan dina raraga parebut bebeneran.

Conto:

Di hareup aya anu keur adu rényom, atuh budak téh teu kaur saré.

4. AKUAN : ngahiap ku basa tur sikep anu saé ka tamu.

Conto:

Resep nganjang ka Bi Sopiah mah, akuan pisan.

5. ALAK PAUL : tebih pisan ka luhur.

Conto:

Di alak paul katingali célak-célak, boa éta téh pesawat nu mawa jemaah haji.

6. AMBÉN : tepas atanapi téras bumi panggung anu tina palupuh.

Conto:

Teu kuateun ku hareudang, balik ti kebon Mang Udin ngadayagdag heula dina ambén.

7. AMIS BUDI: saé budi, upami cumarios sok bari gumujeng.

Conto:

Néng Uci mah amis budi, numatak loba nu resepeun.

8. AMPUH: lungguh timpuh, lemes tingkah lakuna.

Conto:

Néng Imas mah atuda ampuh, jadi moal aya anu wani ngaheureuyan.

9. ANDEGLÉNG : Calik ajeg bari raos tumaninah dina korsi.

Conto:

Basa nyimpang ka imahna, kasampak Juragan Rosid keur andegléng dina korsi.

10. ANGIR : ngumbah rambut, kuramas.

Conto:

Angiran atuh budak téh, geus kotor buukna.

11. ANJUN: tukang ngadamel parabot tina taneuh atanapi garabah.

Conto:

Butuh céngcéléngan mamaungan mah ka Mang Duloh wé da manéhna mah anjun.

12. ANGGUKLUNG: gedé hulu, sombong.

Conto:

Teu resep téh ku angguklungna, mani sagala diwawar-wawar pangabogana téh.

13. ANGKIR : pilari, ulem.

Conto:

Jig geura angkir Ibu Bidan téh, kawasna Si Nyai geus karasa.

14. ANTA : rasa cai tina sumur anu caket ka basisir, semu pangsét.

Conto:

Cai keur nginum mah meuli baé da di dieu mah anta.

15. ARAL: teu nampi kana kaayaan.

Conto:

Sakapeung mah sok aral ningali hahargaan terus nérékél téh.

16. ARANG: langka

Conto:

Arang manéhna mah datang ka imah téh, tapi sakali datang sok saminggu mondokna.

17. ASO, NGASO: reureuh, leleson

Conto:

Nu digarawé ngaso heula bari ngopi.

18. ASEUK: paranti ngaseuk atanapi ngadamel liang dina taneuh kanggo nyimpen binih. Didamelna tina kai panjang anu tungtungna méncos.

Conto:

Mang Minta keur nyeukeutan tungtung aseuk ku bedog.

19. ASEUPAN: paranti nyeupankeun sangu, anu wangunan siga gunung, didamelna tina awi anu dianyam.

Conto:

Meunang ngarih téh diasupkeun kana aseupan, tuluy dikana sééngkeun.

20. AYAKAN: paranti ngala lauk atanapi ngayak, didamelna tina awi anu dianyam rada carang.

Conto:

Sanggeus ditutuan, gaplék téh tuluy diayak ku ayakan.
[9/8 19:52] Ani Herliani SAPAMAS: *KAMUS BASAJAN*

Kekecapan anu tos langki dianggo dina éntri B.

1. BABATANG: mayit

2. BACEM: digodog dina samara, biasana témpé atanapi hayam dibacem heula, nembé digoréng.

3. BADAL: anak lauk kanca

4. BADAMI: ngobrolkeun hiji perkawis dugi ka paheutna.

5. BADARAT: angkat-angkatan bari mapah.

6. BADAUS: kembang tiwu

7. BADAYA: tukang ngibing/tari di karaton atanapi di kabupatén.

8. BADÉGA: réncang atanapi anu babantos.

9. BADEUR: teu kénging diwartosan, tetep waé milampah anu lepat.

10. BADI: pakarang anu siga péso anu gagangna béngkok.

11. BADINDEU: réncang istri.

12. BADINGKUT: simbut anu tina sesebitan lamak anu dikaput dihijikeun.

13. BADODON: paranti ngala lauk anu ditandéan dina cai anu ngamalir.

14. BADOT: embé anu meujeuhna begér.

15. BAKETUT: raray anu baeud semu samutut

16. BAKUTET: ditalian sadayana, henteu mung ukur tungtungna wungkul.

17. BAJIR: sato sapertos sapi, munding, domba, atanapi embé anu henteu anakan. Biasana lintuh margi seueur gajihna.

18. BAJO: rampog

19. BAJRA: pakarang kapungkur anu sapertos gada atanapi gegendir.

20. BALAKAHÉMAN: paripolah anu saraosna, henteu ngaragangan nu sanés.

21. BALAKÉCRAKAN: jalmi seueuran tuang sasarengan.

22. BALAKUTAK: sato laut anu siga cumi-cumi.

23. BALIDEG: beurat mastaka rada rieut.

24. BALINCONG: pakakas paranti nugar, sabeulah lancip sabeulah seukeut.

25. BALIUNG: pakakas tukang kai anu tiasa dirobih cara masang kana gagangna dugi ka tiasa dua kagunaan, tiasa janten siga patik, tiasa janten siga rimbas.

26. BALUKANG, BALOKÉNG: palapah daun kalapa atanapi daun kawung.

27. BALUNG: 1. tulang 2. jawér hayam anu ka luhur.

28. BALUWENG: seueur kabingung.

29. BANGÉNAN: sering kékéngingan. Biasana dilarapkeun kanggo anu nguseup atanapi serit paranti ngala puntang (kutu).

30. BANGGA: hésé

31. BANGUN: siga

32. BANGKANANG: anak banténg

33. BANGKAWARAH, BANGKARWARAH: murangkalih anu bangor, teu sopan, tur awon paripolahna lir anu gagal dina ngatikna.

34. BANGUS: sungut sato anu sukuna opat.

35. BARANGASAN: gampil ambek bari galak.

36. BAREUBEU: pameunteu anu semu beureum ngemu kanalangsa.

37. BAREUEUS: pameunteu anu beureum jalaran  teu damang panas atanapi tilas nangis.

38. BARUNTAK: 1. baruntak atanapi ngalawan ka nu ngajajah
2. ancur rumah tangga.

39. BASILAT: licik, teu jujur.

40. BAYONG: anak boncél. Boncél téh anak lauk kancra.

Berlanggan Tulisan Via Email: