Jalan-jalan ka Guha Pawon

Jalan-jalan ka Guha Pawon

Nyaritakeun jeung Nuliskeun Laporan Kajadian

Saméméh hidep nyaritakeun laporan kajadian sacara lisan, pék baca sing bedas bacaan di handap!

Putri Éndah nyaritakeun laporan kajadian basa jalan-jalan ka Guha Pawon.

Jalan-jalan ka Guha Pawon

Basa dinten Minggu abdi diajak jalan-jalan ka Guha Pawon ku Téh Rinrin. Ari Téh Rinrin téh kapilanceuk abdi anu kuliah di Bandung. Téh Rinrin kedah ngadamel karya tulis ngeunaan obyék wisata anu aya di Kabupatén Bandung Barat.

            Naha bet ka Guha Pawon? Saur Téh Rinrin, Guha Pawon téh tiasa disebatkeun obyék wisata sajarah. Di dinya kantos kapendak tulang-taléng sareng tangkorak manusa jaman purba. Jalmi anu nyicingan tatar Bandung kinten-kinten lima rébu dugi ka salapan rébu taun kapengker, nya éta dina mangsa Tatar Bandung mangrupi situ anu kacida legana. Tah, Guha Pawon téh minangka Panganjrekanana.

            Nguping cariosan Téh Rinrin kitu, abdi jadi panasaran. Hoyong terang kahirupan manusa purba anu aya di urang.

            Abdi mios ti rorompok téh tabuh tujuh, kana motor diboncéng ku Téh Rinrin. Guha Pawon téh perenahna di Désa Gunung Masigit, Kacamatan Cipatat. Henteu tebih ti rorompok mah. Ti Padalarang téh ngulon ka jalan anu bade ka Cianjur. Teras méngkol ka jalan anu bade ka Gunung Masigit. Jalanna saé, katingal anyar diaspalna téh. Parat dugi ka handapeun Guha Pawon.

            Abdi sareng Téh Rinrin henteu langsung ka Guha Pawon, tapi ka Museum Guha Pawon heula. Ningalan heula barang-barang anu aya di éta museum. Tangkorak manusa ogé aya di dinya. Barang sanésna, rupi-rupi pakakas tina batu, anu cenah dianggo jaman harita.

            Ti Museum teras ngajugjug ka Guha Pawon. Motor diparkir handapeun guha. Upami bade ka Guha Pawon kantun naék. Guha Pawon téh kaétang lega. Di lebetna aya sababaraha guha deui, di antawisna: Guha Lega, Guha Kopi, Guha Barong, Guha Tanjung, sareng Guha Poék. Di dinya ogé aya balong alit, anu katelah sumur Bandung. Hanjakal harita mah caina nuju saat, da tara salawasna aya caian.

            Ti Guha Pawon urang tiasa ningal pamandangan alam anu kacida éndahna. Gunung sareng pasir kapur, anu mangrupi sésa-sésa jaman purba, tingjalegir di tengah pasawahan, kebon, sareng pakampungan. Katingal aya satawis jalmi anu nuju panjat tebing. Mémang di sabudeureun Guha Pawon aya pasir-pasir kapur anus ok dijadikeun tempat panjat tebing.

            Di Guha Pawon, salian ti ningalian kaéndahan alam téh, abdi ogé kénging pangaweruh perkawis kahirupan jaman purba.

            Wangsulna nyimpang heula ka warung caket museum. Ngagleuh oléh-oléh kanggo Kang Adi, nya éta dodol jambu batu beureum.

Berlanggan Tulisan Via Email: