4.2. Nulis Warta

Nulis Warta

Nuliskeun warta téh sarua jeung nuliskeun kajadian. Tapi, ti heula ogé geus disebutkeun, henteu sakabéh kajadian  bisa dijadikeun warta. Hiji kajadian  atawahal bisa dijadikeun warta, upama:
1. Éta kajadian atawa hal téh dianggap penting pikeun dipikanyaho ku balaréa.
2. Éta kajadian atawa hal téh dianggap bisa nyumponan kapanasaran balaréa.

Dina pedaran ti heula geus disebutkeun deuih ngeunaan unsur-unsur warta anu disebut 5W + 1 H, any ngawengku who (saha), what (naon), why (ku naon), where (di mana), when (iraha), jeung how (kumaha).

Upama baé aya tabrakan . Unsur 5W + 1 H-na bisa kieu:
1. Saha nu tabrakan téh? Atawa saha anu jadi korban tabrakan teh?
2. Naon anu tabrakan téh?
3. Kunaon pangna nepi ka tabrakan?
4. Di mana tabrakanana
5. Iraha tabrakanana ?
6. Kumaha tabrakanana?

Wartana bisa jadi kieu:
Mobil pikeup anu ditumpakan ku karyawan pabrik aci tabrakan jeung beus Hébring di Sadang, kamari soré (12/2). Akibatna lima karyawan pabrik aci tatu parna sarta kudu dibawa ka Rumah Sakit Bayu Asih, Purwakarta.

Mobil pikeup anu ngangkut karyawan  pabrik aci téh nyiap treuk, teu kanyahoan ti hareupeunana dfatang beus Hébring. “Jedag wé diadu, sorana gé meni tarik”, ceuk Émén anu harita aya di tempat kajadian.

Upama warta téh eusina mangrupa hasil wawancara, unsur 5W +1H-na bisa jadi kieu:
1. Saha anu diwawancara téh?
2. Naon anu jadi bahan carita dina awawancara téh?
3. Kunaon pangna ngomong kitu?
4. Dimana ngomongna? Iraha ngomongna?
5. Kumaha hasil wawancara téh?
6. Atawa kumaha sikepna waktu diwawancara?
Wartana bisa jadi kieu:

Sapatu buatan Cibaduyut Bandung boga kasempetan anu kacida gedéna pikeun diékspor. Komo deui dina nyanghareupan pasar bébas ASEAN taun 2015 engké. Salasahiji sababna, lantaran sapatu Cibaduyut ajénna henteu éléh ku sapatu buatan Cina, anu kiwari keur ceuyah di mana-mana.

Éta hal téh ditétélakeun ku Ketua Bidang Usaha Mikro, dan Menengah (UMKM) Asosiasi Persatuan Sepatu Indonésia (Aprisindo), Betty Brusel, di Unit Pelaksana Teknis (UPT) Sepatu Cibaduyut, sawatara waktu kaliwat.
Upama mangrupa hasil panitén (observasi atawa panalungtikan), 5 W + 1H-na bisa jadi kieu:
1. Saha anu niténan atawa nalungtik téh?
2. Naon anu dititénan atawa ditalungtik téh?
3. Ku naon sababna  maké dititénan atawa ditalungtik?
4. Di mana niténan atawa nalungtikna?
5. Iraha niténan atawa panalungtikanana?
6. Kumaha hasilna?
Hasilna bisa jadi kieu:

Barudak Sunda kiwari leuwih wanoh kana kasenian deungeun tibatan kana kasenian tradisional Sunda. Kitu hasil panalungtikan Lembaga Kebudayaan Sunda Sawawa (Leksus), sakumaha anu ditétélakeun ku Pupuhu Leksus, Yayan Sopyan, Senén (3/3).

Nurutkeun yayan, éta panalungtikan téh dilaksanakeun di wewengkon Kabupatén Bandung Barat salila bulan Januari 2017. Ari sampelna 400 siswa SMP anu dianggap bisa ngawakilan siswa SMP di Kabupatén Bandung Barat.
Ari éntép-seureuhna mah teu kudu persis kitu. Hartina, palebah heula-pandeurina anu dituliskeun jadi warta mah, diluyukeun jeung kapentingan wartana baé.
Dina nulis warta aya prinsip anu disebut “piramida terbalik”, nya”eta ngaheulakeun inti warta atawa enas-enasna warta. Saterusna medar sarupaning perkara anu ngadukung kana inti warta téa.
Sabada  warta réngsé, léngkah saterusna nyaéta ngajudulan. Bisa anu dijadikeun judul téh inti tina éta warta atawa jejerna. Upamana baé kieu:
1. Pik-up  tabtakan jeung Beus, Lima Karyawan Pabrik Aci Tatu Parna
2. Sapatu Cibaduyut Baris nembus Ékspor
3. Barudak Sunda Kiwari Leuwih Wanoh kana Kasenian Deungeun

Nu kudu diperhatikeun, judul warta téh kudu bisa ngagambarkeun eusi warta, jeung ngahudang kapanasaran anu maca.

Daptar Pustaka

Taufik Faturohman,spk.2017.Gapura Basa Pangajaran Basa Sunda Pikeun Murid SMP/MTs Kelas VIII. Bandung. Geger Sunten.


Regepkeun vidio warta di handap ieu!: 
Sakola buka dina mangsa sasalad covid-19

Berlanggan Tulisan Via Email: